Alman kolonistləri tərəfindən salınan Göygöl rayonu bu gün Qərb bölgəsinin ən məşhur turistik rayonlarından biridir. İlk dəfə burada cəmi 56 ailə yaşayıb, alman memarlığı üslubunda evlər tikilərək 6 küçə salınıb.
Məşhur Kəpəz dağı, Göy-göl, Maral-göl, Zəli-göl, Ayna-göl rayon ərazisində yerləşir. Bakıdan uzaq olsa da, bu qədər gözəl yerlərin olduğu bir rayon, təbii ki, turistlərin sevimli istiqamətlərindən biri olmalı idi.
Göygöl rayonu füsunkar təbiəti ilə yanaşı, tarix və mədəniyyət abidələri ilə zəngindir. Göygöl rayonunda mövcud olan 32 yerli və ölkə əhəmiyyətli tarixi abidə qeydiyyata alınmışdır ki, bunlardan 9-u arxeoloji, digərləri isə memarlıq abidələridir.
Göllər tacı Göygöl Milli Parkının turistlər üçün yenidən açıq olması bu yerlərə marağı daha da artırıb. Məhz bunun nəticəsidir ki, son illər Göygöl rayonuna gələn turistlərin sayında artım müşahidə edilir.
